الحلقة الثالثة:يوم عصيب
الزمان:الثلاثاء 26 سبتمبر..الساعة 6 الصبح
المكان:بيت العبد لله
"أحمد...اصحى يا أحمد"
صحيت على صوت امى الحبيبة و انا مستغرب..المفروض ان النهاردة محاضرتى الساعة 9,30 ..يعنى كان لسه قدامى شوية
أحمد:يا الله..في ايه يا ماما بس.أنا محاضرتى الساعة 9,30..هو انا سواء عندى بدرى او متاخر تصحينى الساعة 6
ماما:مانا عارفة..قوم علشان ما تبقاش متسربع
أحمد:ايه دا يا ماما..بقى انتى اللى مامتى من 18 سنة.لسه ما عرفتنيش
ماما:فيه ايه يا ولد
أحمد:فيه ان ابنك بيموت فى السربعة......انتى ما تعرفيش ولا ايه
ماما:قوم يا ولد بلاش كسل
أحمد:يا ماما سيبينى براحتى الله يباركلك
ماما:ماهو هيباركلى باذنه بس قوم
أحمد:طب 5 دقايق بس
ماما:ما هو انت اصلك لو ماكنتش قاعد بتتقرج و سهران قدام الفيلم الأجنبى امبارح كان زمانك قايم دلوقتى
أحمد:طب اعمل ايه بس.هما ما بيجيبوش الحاجات الحلوة الا فى الأوقات دى
ماما:اه ماهى دى سياستهم..عايزين يبوظوا البلد...سياسة امريكا واسرائيل..ما عرفوش يخشوها بالدبابات.دخلوا من مليون سكة تانية
أحمد:هوووووووووووووووووووووووووووووووووووووووه...ايه ده
يا أم أحمد يا أبهة ,,ايه العظمة دى كلها
امى بتتكلم فى السياسة يا جدعان
بس ياما الله لا يسيئك ....سيبينى انام ياما بقى
ماما:قوم باه
أحمد:يووووووه..الطم ياما الطم... ادينى قومت اهو..الرحمة من عندك يارب..الله يخرب بيت اللى كان السبب
وكالعادة..اتوضيت وصليت.اكلى وشربى واجندتى وسلطاتى وبابا غنوجى..بيييييييييييس..على المترو بقى
قابلت واحد صاحبى من ايام المدرسة فى المحطة..راح عين شمس..فاشل فاشل
واقف على الرصيف فى انتظار المترو انا وهو
المترو جاى..والناس واقفين ورايا بيزقوا فيا من قبل المترو ما يقف...لقيت صاحبى بينده عليا
محمود:اااااااا..بقولك ايه يا احمد..متهيألى نركب المترو الجاى
أحمد:ايه ياد انت عبيط ولا ايه..انا المترو دا عندى شرف..لو فوتت المترو ممكن افوت اى حاجة تانية
انا سمعت من ورايا المترو بيفتح بيبانه..محمود قالى:صدقنى أنت مش عايز تركب
انا ماكنتش بتحرك..انا كنت ماشى بقوة الدفع ناحية الباب
أحمد:اه مانت اصلك فافى..يا بنى المترو ده للرجالة
محمود:طب يا عم الراجل..اركب انا الغلطان
بصيت لمحمود من فوق لتحت..وقمت ملتفت ناحية المترو و
يا لهويييييييييييييييييييييييييييييييييييييييييييييييييييييييييييييييييييييييييي...
.....اههههههههههههههههههههه
المترو مافيهوش مكان لنملة...عادى
الناس بيزقونى عادى برضه
بس اللى مش عادى انى لقيت الباب بيقفل عليا والناس بتزق فيا من الناحيتين..وانا مش عارف اخرك عضلة فى جسمى..كأنى صلصال
أحمد:محمووووووووووووووووووود..الحقنى يا محمود
محمود:ايه يا راجل..مالك متضايق ليه
أحمد:مش وقت شماتة يا اهبل..الحقنى,انا بتسف يا محمود
محمود قاعد بيصفر وعلى وشه برود روسي أصلى
أحمد:الله يخرب بيتك..أشهد ان لا اله الا الله وأشهد أن محمدا رسول الله
غمضت عينى فى انتظار المصير المؤلم و فتحتها
لقيت نفسى واقف جوه المترو
اه والله هو المترو ..صحيح فى حيطة طويلة ومتعلق فى اخرها راس بنى ادم واقفة قدامى..بس هو المترو
هييييييييه...أنا حى أنا حى
اختصارا للتفاصيل.وصلت الجامعة ..صحيح كان فى اصابات بس لسه عايش والحمد لله
أحمد:هه..المترو للرجالة..صحيح عيال فافى...اه يا غضروفى يانا اه
دخلت الجامعة وصلت للمدرج الساعة 9 بالضبط
قعدت مع شوية عيال نحكى فى ذكريات الثانوية الأليمة
لو سألت أى واحد فى اولى جامعة لو رجع بيك الزمان علشان تغير حاجة فى حياتك هتغير ايه..هيقولك من غير تفكير نتيجة الثانوية
احنا فالحين نصيع ونتدلع بعد كده نرجع نلطم و نقول ياريت اللى جرى ماكان
أحمد:بالمناسبة ياد يا حامد...هو الدكتور بتاع النهاردة هيدينا ايه
حامد :هيدينا تيرمينيولوجى
أحمد:ارميك لايه يا حبيبى
حامد: تيرمينى فين يا عم انت..بقولك تيرمينولوجى
أحمد :أيوه مانت بتقول ترمينى اهو
لقيت واحد من ورايا بيقول:ترمى ايه يا جاهل انت.بيقولك تيرمينولوجى
بصيت لقيته الواد اللى قاعد بيهز فى راسه من اول السنة
هو انت ...يا اهلا بالحبايب
مش عايز اقولكم انا اتغظت ازاى..حاجة تنرفذ يعنى...ماتبقاش الا ده اللى يتنطط عليا..وبعدين هو يعرفنى منين اصلا
أحمد:وانت مالك يا بنى ادم(ربنا عالم اللى فى ضميرى) وبعدين مادام انت فقيق اوى كده قوللى معناها
يعنى سلوكية يا جاهل
أحمد:ممم..سلوكية..اذا كان السلوكية يا اهبل عندنا فى الترم التانى
حامد:هش هش...الدكتور جه
كان باين عليه دكتور كويس والله...قعد يضحك معانا شوية..وقالنا يعنى ايه تيرمينولوجى
طلعت مادة اللغة
بصيت ناحية الواد الهزاز لقيت وشه جاب الوان السما التسعة
أحمد:عارف لو فتحت بقك تانى أو شفتك بتهز راسك تانى هاعمل فيك ايه يا رفضى يا جزمة يا حيوان يا ********************(كلام ترفضه الرقابة)
طب ايه يا دكتور مادة اللغة دى
قالك اللى واضعين المناهج مفترضين ان احنا 100% فى الانجليزى فبيدونا الاقتصاد والادارة بالعربى (اللى احنا بناخدوهم بالانجليزى أصلا) من باب التثقيف
الواحد مابقاش عارف يضحك ولا يعيط
يضحك على اللى فاكرينا 100% فى الانجليزى(دا انتو ولاد حلااااااااااال)ولا يعيط على الكوارث اللى هترف على دماغه
الدكتور خلص الساعة 11 و خرج..قلت قشطة..اروح بقى
خارج من المدرج قابلت الواد جمال
جمال:ايه يا مان مروح ولا ايه
أحمد:اه يا عم..انت قاعد؟
جمال:يا بنى فى محاضرة
احمد:ايييه.الساعة كام انشاء الله
جمال:الساعة 12,30.مش هتحضر ولا ايه
أحمد:عند أمه يا أدهم
الموبايل بتاعى رن..بصيت على النمرة.لقيتها نمرة أبويا
أحمد:الو..أيوه يا بابا
بابا:أيوه يا أحمد...خلصت ولا لسه
أحمد:أيوه يا بابا خلصت وجاى
جمال:خلصت ايه يا بنى..فى محاضرة يا بنى
أحمد:الله يخرب بيتك...اسكت
جمال صوته بسم الله ما شاء الله..يسمع أمريكا
جمال:يا بنى انت حمار ..من أول السنة كده عايز تفوت محاضرات
بابا:ايه دا يا أحمد انت عندك محاضرات تانية
أحمد:لا يا بابا ما عنديش
أنا بقيت ماسك الموبايل بايد وبالايد التانية بضرب جمال
جمال:اييييي..بتضربنى ليه...وبعدين بتكدب على باباك
بابا:فيه ايه يا أحمد.انت عندك محاضرات تانية ولا لأ
أحمد:أيوه يا بابا..بس مش هقدر أحضرها
المكالمة فضلت ييجى خمس دقايق بين زعيق ماما على التليفون ورغى زفت الطين اللى اسمه جمال..وانا قربت اتشل
المهم فى الاخر..حفاظا لماء وجهى..وبناء على اوامر الحاج صاحب البييييييييييييييييييت..علشان هددنى انه يخرجنى بره البيت... وافقت ان انا اعد..و قلت لجمال:وحياة امك مانا سايبك
قعدت وانا دمى بيغلى..وعطشى كمان بيغلى
نزلت اتمشى شوية فى الجامعة..لقيت كافيتريا قافلة وجنبها تلاجة بيبسى ..ومرسوم عليها الازازة المشبرة..وانا بموت بحسرتى
اه يانى ياما يانى ياما...الله ياخدك يا جمال الكلب
الساعة جت 12,30..الدكتور جه
باين عليه كويس برضه..ربنا يسهل
دخل قعد يهنينا بالعام الجديد....وقالنا لازم ما نعتمدش على الملخصات ولازم نذاكر من الكتب والا هنسقط...الخ الخ
قعد يعيد و يزيد فى نفس الكلام نص ساعة..انت ناوى تعد الساعة ونص كلهم ولا اييييه
بعد كده ادانا مقدمة عن المنهج اللى احنا حناخده
الساعة جت 2 الا خمسة...والدكتور لسه ماخلصش..او حتى بين نية انه يخلص
العيال ابتدوا يقعوا مغمى عليهم
الدكتور:ايه دا انتوا تعبتوا ولا ايه...ده لسه بدرى
بدرى؟؟؟؟
هو قال الكلمة دى من هنا..ولقيت العيال قاموا وعينيهم احمرت وطلعلهم قرون فوق روسهم زى التيران والدخان بقى يخرج من مناخيرهم
الدكتور اتاخد...قالنا هى الساعة كام
قولنا له 2 الا خمسة
قال طيب كفاية عليكم كده النهاردة
كان عندك نية انك تعد اكتر من كده مثلا...كنت هفطر هنا انا بقى
خرجت و مش قادر اوصف لكم حالتى كانت عاملة ازاى..طلعت على المترو وركبت,,,المترو مافيهوش كرسى واحد فاضى
اه ماهى ناقصة..هو يوم باين من اوله.الله يخرب بيت اللى كان السبب
لغاية محطتى ما لقيتش كرسى اعد فيه
طبعا وصلت بيتى وانا حالة الميتين احسن من حالتى بكتييير
دخلت..ما قلتش سلامو عليكم ..دخلت على السرير عدل
اترميت عليه كأنه حبيبتى اللى بقالى كتير ماشوفتهاش
وهى دقيقتين وكنت رايح فى النوم
ما صحيتش على الفطار.صحيت بعديه بساعة و
والى يوم اخر
...................................................
الحلقة الرابعة:يوم غير عادى
الأربعاء 26 سبتمبر
أول مرة اكتب يوميات فى يومين ورا بعض..بس انا عمرى ما اتبهدلت زى ما اتبهدلت فى اليومين دول بالذات
كالعادة بكل سعادة فى كل صباح قعدت نص ساعة اتناقش مع امى فى مشكلة الوقت..وطبعا اتفرع الموضوع لألف حاجة تانية
فجأة لقينا نفسنا بنتكلم عن العبارة 98 المنكوبة و رغيف العيش المنكوب(قريبا ان شاء الله) يالا مالناش دعوة بالسياسة
و طلعت على المترو.......انتو عارفين الباقى بقى
خرجت من المترو وانا بعرج..وطلعت على المدرج
ايه ده؟؟مفيش حد خالص
المدرج فاضييييييييي..لسه ماحدش جه
الوقت بيعدى..فاضل ربع ساعة على المحاضرة.وماحدش جه
ميعاد المحاضرة جه وفات بعديه حبة.وأنا قاعد على سلم المدرج الخلفى..سمعت صوت ناس طالعة على السلم...هيييه..الناس جت
وقفت على السلم مستنى بقى.طلع الأول.....معرفوش
التانى......معرفوش
التالت......معرفوش
يا نهار اسود..دى مش دفعتى..صحيح انا مابقاليش كتير فى الكلية...بس ابتديت احفظ الوشوش برضه.وبعدين كلهم بسم الله ماشاء الله حيطان واقفة قدامى يعنى شكلهم كبار..وقفت متنح لهم ووقفوا متنحين لى.كانوا عايزين يقلبوها خناقة .. مابدهاش... مش هينفع غير القوة..قلت اتخن صوتى يمكن يرتجعوا
احمد:انتو مين؟؟
مش هقولكم على اللى حصل بقى
انا لقيت الارض بتتهز..والسقف حتت بتقع منه..والناس بتهرب
أنا الأول كنت فاكر ان ده من صوتى...قلت شمشون قاعد معاهم بقى
بس اتارى ده كان من صوتهم هما.. لقيتهم بيقولوا: انت اللى مين..
أنا من قوة الصوت.وقعت على ودنى اصنجيت..حسيت ان الأرض اللى شايلانى بقت كلها ميه
اللى انا فاكره بعد كده ان الدنيا ضلمت...لقيت العيال كلهم متلمين عليا..بعد كده واحد مس ايدى ولاعبنى ادى البيضة وادى اللى كلها..بس بطريقة قاسية شوية..يعنى احنا عادة بنتنى الصوابع.لأ ده كان بيكسر صوابعى..شوية ولقيت حاجة لابسة رجل بنطلون جينز يمين بتطير فى الهوا..
أحمد:كابتن هو ايه اللى طار ده
"رجلك اليمين"
أحمد:يا راااااجل..يالا مش مشكلة دى ححتى كانت خنانى..بس انتو هتسيبولى الشمال صح؟
شوية و الشمال طارت.... الغريبة انى ماكنتش حاسس بحاجة خالص.كأن جتتى نحست.
وده دراعى اليمين.يا لهويي..
وادى اختها الشمال..
وده............لالالالالالالالالالالالالالالالا...كله الا ده..ده شرفى و كرامتى(قال يعنى كرامتى ماتبهدلتش)كله الا ده...يا سفلة ..يا ولاد الكلب..لأ دولا عدوا مرحلة الكلب من زمان..يا ولاد الديناصورات
"كابتن يا كابتن..هو كله خلع خلع مفيش لخلخة ولا ايه"
انما لا حياة لمن تنادى
أنا برضه مهما كان..ماهانش عليا كام شاب زى الورد يضيعوا فى بوكس واحد منى...قلت انا هعرف الم اللى اتبعتر منى بعد كده..انتوا عارفين
نزلت من المدرج وانا ميت من الغيظ
حاولت اكلم اى حد من العيال.ماحدش بيرد..فضلت واقف تحت شوية وبعدين طلعت على الكلية علشان اشوف الجدول..لقيت محاضرتين علينا فعلا..واحدة الساعة 9,30 اللى هيا المفروض كنت انا مستنيها..وميعادها عدى منه ساعة
وفى محاضرة تانية الساعة 12,30
ببص على المكان...مدرج 17د
يا نهار اسود..انا بسمع ان المدرج ده بعيييد
شديت الرحال وقررت ابدا المشوار
سالت على المدرج..لغاية لما ليت حد يعرف عدت نص ساعة..كده اول محاضرة ضاعت ..شاورولى على مبنى بعيييييييييد وقالولى ورا المبنى ده هتمشى 5 دقايق
قلت فل..ورحت للمبنى..وعديته ومشيت اكتر من خمس دقايق...وقفت علشان اسال ناس
قالولى تمشى على طول لخمس داي هتلاقيه
الله يخرب بيت الخمس دقايق بتوعكو دول
المهم بعد كذا(خمس دقايق)وصلت للمدرج..أنا فاكره زى مدرجنا بقى..لالالالالا
مدرجنا بالنسبة له عيل فى كى جى 2
ده حاجة عملاقة..وما تتوصفش..هو فيه شبه شوية من استاد القاهرة
دخلت..لقيت كل الناس ماسكين بالطوهات بيضا
قلت اه..انا وقعت فى مدرج صيدلة
اخش اسال اى حد.صيدلة
الله..امال ايه اللى فى الجدول..قلت لا خاب من استشار..سالت عيال فى الحكاية دى..ما لوش ليها حل برضو..لغاية لما لقيت واحد بيقولى:ممكن يكون قصدهم السكاشن
أحمد:نعم..سك ايه؟؟
أيوه ممكن يكون صدهم سكشن د 17
أحمد:يا حلاوة..وده ألاقيه فين
لا ده بعييييييد..لسه عند كلية العلوم
يالهويييي.كلية العلوم دى عند مدرجنا..يا نهار اسود..يعنى لسه هارجع المشوار ده كله
خرجت وانا بسب وبلعن فى كل حاجة..وانا ماشى قابلت وائل..واحد كان معايا فى درس من ايام الثانوية..سلمنا على بعض سألنى انت هنا فين..قلتله تجارة
سالته نفس السؤال..قالى حاسبات و معلومات
اهه..اهئ اهئ اهئ...جيت على الجرح
سبته ومشيت..ببص لقيت الطفطف..حلو اهى حاجة توصلنى بسرعة
طلعت ركبت ودفعت الأجرة..انهبونا بقى براحتكم بس هنقول ايه..ان كان ليك حاجة عند ال
ما علينا..قاعد مستنى الطفطف لما يتملى ببص فى الساعة لقيتها 12,00..أنا مش هروح فى الليلة دى ولا ايه
الطفطف اتملى..اطلع يا اسطى
لثوانى.اتهيألى ان الطفطف ما بيتحركش..بعد ده لقيت الأرض بتتهز...زلزااااااال
لا مش زلزال..ده الطفطف بيطلع.هى باينة من أولها..بس قشطة مادام عمل كده وهو بيطلع يبقى هيمشى سريع
انما ايه قطر الأموات اللى احنا راكبينه ده
أحمد:يا أسطى سرع شوية
الأسطى:الصبر جميل يا أستاذ
أحمد:يا عم الصبر جميل ماقلناش حاجة بس سرع فى الكاريتة اللى احنا راكبينها دى
الأسطى:انت مستهون بالطفطف ده ولا ايه..طب اصبر عليه خمس دقايق وهو هيعمل حتة سبرينت
أحمد:سبرينت ايه..انت حد قالك انك سايق طفطف بورش
المصايب لا تاتى فرادا..الاخ خد نص ساعة عبال ما وصلت للسكاشن
على الأقل مش هستنى كتير..رحت على ميعاد المحاضرة بالضبط..طلعت سيكشن 17د..برضه فاضى
يادى النيلة قعدت جوه مستنى.5 دقايق عشرة.ربع ساعة
وفجأة.الموبايل رن..كان جمال
أحمد:ايوه يا جمال انت فين..قاعد برن عليك من الصبح
جمال:ايه يابنى فى ايه..أنا فى البيت
أحمد:البيت...؟؟بيت ايه مش هتيجى المحاضرة
جمال:محاضرة ايه يا بنى...مفيش محاضرات النهارده
اييييييييييييييييييه
يعنى ايه مفيش محاضرات..مش المفروض عندنا محاضرتين
جمال:أيوه يابنى ماهو الجدول اتغير.الاربعاء بقى عندنا فاضى
أحمد:يا نهاااااااااااار
جمال:لا هو انت قعدت ملطوع كل ده فى الجامعة...يا عينى...ههههههههههه
أحمد:جمال
جمال:نعم
أحمد:اقفل بدل ماجيلك فى بيتك واخدك بالتاكسى على عمر مكرم...اقفل
جمال:طب خليها فى الشاذلية علشان أقرب لى......ههههههههههههههههههههه
أحمد:اسفوكس عليك.أنا غلطان انى عرفت واحد ************* زيك
وقفلت السكة وانا دمى بيغلى وعدى مرحلة الغليان
بقى انا دابب المشوار ده..وقاعد كل ده..علشان فى الاخر يطلع مفيش محاضرات
اللهى الجامعة تولع بجاز معفن..يالا يا ولاد ال
رحت المترو و دخلت وقعدت فى مكان فاضى.واديتها نوم
ماحسيتش بنفسى الا و فى حد كان قاعد بيهز فى كتفى
"يا بنى.اصحى يا بنى"
أحمد:أيوه ثانية واحدة هاقوم والبس وخخخخخخخخخخخخخخخخخخخخ
"تلبس ايه..قوم يا حبيبى"
أحمد:خلاص قولهم خمس دقايق بس وانا هجيلهم بس جهزلى انت العربية الخخخخخخخخخخخخخخخخخخخخ
"يا بنى..قوم بقى"
صحيت لقيته راجل كبير.ببص حواليا ليت نفسى فى محطة المرج.اخر محطة فى الخط
ياااااااااه..أنا نمت كل ده
شكرت الراجل الكبير و خرجت وركبت المترو ورجعت على البيت
ماما:حمدالله على السلامة يا احمد ...عملت ايه النهاردة فى الجامعة
أحمد:لو سمعت كلمة فيها حرف ج أو م أو ع..هروح أفجر نفسى فى الجامعة دى..أنا لفيت الجامعة كلها النهاردة على الفاضى..انا اللى حصلى النهاردة كتير اويييييييييييي..انا عايز أنااااااااااااااااااااام يا ماما
ماما بصيتلى وهى مستغربة اوى...وبعد كده ضحكت..وفهمت ان انا كان يومى مش سهل,,فسابتنى
اما انا..فدخلت أوضتى و كملت اللى انا بديته فى المترو..ومش فاكر أى حاجة فى اليوم ده بعد كده
والى يوم اخر
موضوع: الحلقة الرابعة:يوم غير عادى..مابيحصلش مرتين لنفس البنى ادم 
الأحد يناير 20, 2008 11:35 pm
